گوتەبێژی بەڕێوەبەرایەتیی گشتیی حەج و عومرە ڕایدەگەیەنێت، كۆتایی مانگی ئایاری ئەمساڵ یەكەم كاروانی حاجییانی هەرێمی كوردستان دەچێتە وڵاتی سعوودییە و، هەموو ئامادەكارییەكانیان بۆ ئەو پرۆسەیە تەواو كردوون.
كاروان ستوونی، گوتەبێژی بەڕێوەبەرایەتیی گشتیی حەج و عومرەی هەرێمی كوردستان، ڕاگەیاند، لە كۆتایی مانگی ئایاری ئەمساڵ، یەكەم كاروانی حاجییانی هەرێمی كوردستان لە ڕێگەی وشكانی و ئاسمانییەوە بەرەو وڵاتی سعوودییە بەڕێ دەكەوێت.
كاروان ستوونی گوتی، ڕۆژی سێشەممە، 28-05-2024، یەكەم كاروانی حاجییانی هەرێمی كوردستان كە ژمارەیان هەزار و 500 كەسە، لە ڕێگەی وشكانییەوە بەرەو وڵاتی سعوودییە بەڕێ دەكەوێت. ئاماژەی بەوەش كرد، ڕۆژی چوارشەممە، 29-05-2024، یەكەم كاروانی حاجییان كە ژمارەیان سێ هەزار و 185 كەسە لە ڕێگەی ئاسمانییەوە دەچێتە سعوودییە و، وابڕیارە تا 05-06-2024، هەمووان بگەنە ئەو وڵاتە.
تێچووی حەجی ئەمساڵ لە ڕێگەی هێڵی ئاسمانی ، 4800 هەزار دۆلارە (شەش ملیۆن و 650 هەزار دینار)، لە ڕێگەی وشكانیشەوە، 4000 دۆلارە (پێنج ملیۆن و 300 هەزار دینار). ستوونی روونی كردەوە، دوای هەوڵێكی زۆری وەزارەتی ئەوقاف و كاروباری ئایینی و بە پاڵپشتی دارایی حكوومەتی هەرێمی كوردستان تێچووی حەج لە هەرێمی كوردستان هاوتای تێچووی حاجییانی ناوچەكانی دیكەی عێراق كراوە.
بە گوتەی كاروان ستوونی، بەڕێوەبەرایەتیی گشتیی حەج و عومرەی هەرێمی كوردستان بە هەماهەنگی لەگەڵ لایەنە پەیوەندیدارەكانی سعوودییە، شوێنی نیشتەجێبوون، خواردن، هاتووچۆ و چاودێریی تەندروستیی بەردەوام و پێشكەشكردنی رێنمایی ئایینی بۆ حاجییانی هەرێمی كوردستان دابین كردووە.
ئەمە لە كاتێكدایە لە ڕۆژانی 10 بۆ 12ـی حوزەیرانی 2023، چوار هەزار و 685 هاووڵاتیی هەرێمی كوردستان لە ڕێگەی وشكانی و ئاسمانییەوە بۆ بەجێگەیاندنی “فەریزەی حەج” چوونە شاری مەككە و، دوای نزیكەی مانگێك مانەوە، لە ماوەی نێوان 10-14ـی تەمموزی 2023، گەڕانەوە هەرێمی كوردستان.