بەغدا گوژمەیەکی دیکەی پارە بۆ مووچەی مانگی هەشت دەنێرێت و وەزارەتی دارایی و ئابووریش ئەم هەفتەیە لیستی مووچە بڵاودەکاتەوە.
حکومەتی هەرێمی کوردستان بۆ مووچەی هەر مانگێک بڕی 998 ملیار دیناری پێویستە، بۆ مووچەی مانگی هەشت بەغدا 755 ملیار دیناری ناردووە و بڕی 243 ملیار دینار کورتهێنان هەیە، دوو ڕۆژە شاندێک لە بەغدایە بۆ چارەسەرکردنی ئەم گرفتە و چەند پرسێکی دیکە.
لە کۆبوونەوەی ئەمڕۆ سێشەممەی نێوان هەردوو شاندی هەرێمی کوردستان و عێراق لە بەغدا، بەرچاوڕوونی تەواو لەبارەی لیستی مووچەی فەرمانبەران خراوەتەڕوو، لەلایەن وەزارەتی دارایی عێراق بڕیاری خەرجکردنی گوژمەیەک پارە وەکو تەواوکاریی مووچەی مانگی هەشت دراوە.
دیار نییە بڕی ئەو پارەیەی بەغدا دەینێرێت چەندە، بەڵام دیارە کە کورتهێنانی مووچەی مانگی هەشت 243 ملیار دینارە. بەغدا هەرچەند بنێرێت، ئەوی دیکە لە داهاتی ناوخۆ پڕدەکرێتەوە.
سەرچاوەیەک لە وەزارەتی دارایی هەرێمی کوردستان ، گوتی؛ تاوەکو ئێستا پارە نەخراوەتە سەر هەژماری بانکی هەرێمی کوردستان، هەر کاتێک پارەکە نێردرا ڕاستەوخۆ لیستی مووچە بڵاودەکەنەوە. زانراوە سبەی یان دووسبەی پارەکەی بەغدا دەگات و ئەم هەفتەیەش لیستی مووچە بڵاودەکرێتەوە.