وتەبێژی پارتی سۆشیال دیموکراتی کوردستان رایگەیاند، ئەو گێرەشێوێنییەی لە مانگی4ی ئەمساڵ رویدا دەرکراوەکان دروستیان کرد، ئەویش سەرکردەی دەرکراوەکان واتە وەزیری کاروباری شەهیدان و ئەنفالکراوانە، دەشڵێت، هیچ پەیوەندییەکی بە پارتی سۆشیال دیموکرات نەماوە.
د. فەرهاد تۆفیق وتەبێژی پارتی سۆشیاڵ دیموکراتی کوردستان لە بڵاوکراوەیەکی تۆڕە کۆمەڵایەتییەکان نوسیویەتی، “ماوەیەکی زۆرە هیچ وەڵامێکمان بۆ ئەو چەواشەکاری و کردەوە نەشیاوانەی دەرکراوەکان نەبوە و لەئاستی ئەوەدانەبون جوابیان بدەینەوە، بەڵام بۆ چەواشەکاریی بەردەوامیان و ئەو بەناو ڕونکردنەوەیەی لە رۆژی 17ی مانگی (حوزەیران/6) بڵاویانکردۆتەوە، چەند خالێک بۆ خەلکی هەرێمی کوردستان دەخەینەڕو.”
ئاماژەی بەوەشکردوە، “ئێمە باوەڕمان بەتێگەیشتویی جەماوەر و نوخبەی کوردستان هەیە و لەسەر ئەو بنەمایەشە، کە وتومانە کاروانی خەباتی ئێمە ئەڕوات و ئەوانیش بۆخۆیان بڵێن، بەڵام بەداخەوە وادیارە هەتا ئێستاش لە پەلاماردانی حزب ناکەون و هێشتا بەمانگەشەو هەڵدەشاخێن و بەردەوامن لەچەواشەکار و قسەی نابەجێ و ناتوانن دەستبەرداری درۆو دراو و دزی بهێنن و شۆکی دۆڕان سەرلێشێوانیان بەرینەداون.”
ئەوەشی خستوەتەڕو، لەدوایی ئەو گێرەشێوێنییەی لەمانگی (نیسان/4)ی ڕابردودا، دەرکراوەکان دروستییان کرد، تەنانەت ئەوەی سەرکردەی دەرکراوەکان، کە وەزیری کاروباری شەهیدانە، زۆر نابەرپرسانە لەکەناڵەکانی ڕاگەیاندنەوە هەرچی وتی درۆبو و تەنانەت یەک ڕستەشی ڕاست نەبو.
وتەبێژی پارتی سۆشیاڵ دیموکراتی کوردستان باسی لەوەشکردوە، “ئێمە دانمان بەخۆماندا گرتوە و ئەو کارە ناشرین و تاوانبارییەی ئەنجامیانداوە، بەجێهێشتوە بۆ دادگاو هیچ جۆرە دەستێوەردانێکمان نەکردوە تا دادگا بەسزای یاسایی خۆیان بگەیەنێت، حزبی سۆسیالیستیش بە پێی یاسایی حزبی سزای زیاتری حزبیان لەسەر جێبەجێدەکات.
وتیشی ، “وەزارەتی کاروباری شەهیدان هیچ پەیوەندییەکی بە حزبی سۆسیاڵ دیموکراتی کوردستانەوە نەماوە و وەزیرەکەشی هەرکارێکی دور لەبەرژەوەندیی کەسوکاری سەربەرزی شەهیدان ئەنجامداوە بۆ بەرژەوەندی شەخسی خۆی بوە، بەدەر لەوە یاسا سزای توندی دیاریکردوە بۆ ئەوکەسانەی پۆست و پێگەی حکومی بۆ بەرژەوەندی کەسی بەکاردەهێنن.”
ئەمەش لەکاتێکدایە، رۆژی 17ی مانگی6 نوسینگه‌ی عه‌بدوڵا حاجی مه‌حمود رایگەیاند، ئه‌و كه‌سانه‌ی له مانگی ره‌مه‌زانی پیرۆزدا هێرشیانكرده سه‌ر ماڵه‌كه‌ی له گوڵه‌خانه فه‌رمانی ده‌ستگیركردنیان هه‌یه و ده‌ستگیرنه‌كراون، ئێستاش پڕوپاگه‌نده بڵاوده‌كه‌نه‌وه و ده‌شڵێت، “دڵنیام داموده‌زگاكانی ئاسایش له سلێمانی و هه‌ڵه‌بجه به‌ئه‌ركی خۆیان هه‌ڵده‌ستن و تۆمه‌تباران ده‌ستگیرده‌كه‌ن”