رێژەی دەنگدەران لە هەرچوار پارێزگای هەرێمی كوردستان بڵاو دەكرێنەوە

گوتەبێژی کۆمیسیۆنی باڵای سەربەخۆی هەڵبژاردنەکانی عێراق رێژەی دەنگدەرانی لە هەرچوار پارێزگای هەولێر و سلێمانی و دهۆك هەڵەبجە راگەیاند بۆ بەشداریكردن لە هەڵبژاردنی خولی شەشەمی پەرلەمانی كوردستان كە بڕیارە لە 20/10/2024 بەڕێوەبچێت.

جومانە غەلای گوتەبێژی کۆمیسیۆنی هەڵبژاردنەکانی عێراق رایگەیاند: نزیکەی 3 ملیۆن و 800 هەزار دەنگدەر لە هەرێمی کوردستان هەن، بەڵام لەو ژمارەیە تا ئێستا تەنیا 2 ملیۆن و 901 دەنگدەر ناوی خۆیان بۆ هەڵبژاردنی خوولی شەشەمی پەرلەمانی کوردستان تۆمار کردووە.

راشیگەیاند: لەو ژمارەیە 2 ملیۆن و 672 هەزار لە دەنگدانی گشتین، هەروەها 239 هەزار کەسیش لە دەنگدانی تایبەتدا دەنگ دەدەن.

جومانە غەلای رێژەی دەنگدەرانی لە هەرچوار پارێزگای هەولێر و سلێمانی و دهۆك و هەڵەبجە بەمشێوەی خوارەوە دیاری كرد:-

لە پارێزگای هەولێر 1 ملیۆن و 16‌ هەزار و 357 دەنگدەر هه‌ن،‌ له‌و ژماره‌یه‌ 928 هه‌زار و 823 كه‌س له‌ ده‌نگدانی گشتی و 82 هه‌زار و 525 دەنگدەریش لە دەنگدانی تایبەت ده‌نگ ده‌ده‌ن.

ژمارەی دەنگدەران لە پارێزگای سلێمانی بریتییە لە 1 ملیۆن و 146 هەزار و 530 دەنگدەر،‌ له‌وانە 1 ملیۆن و 3 هەزار و 772 دەنگدەر لەدەنگدانی گشتی، هه‌روەها 74 هەزار و 915 دەنگدەریش بۆیان هەیە لە دەنگدانی تایبەتدا دەنگ بدەن.

له‌ دهۆكیش 738 هه‌زار و 193 ده‌نگده‌ر هه‌ن، كه‌ له‌وه‌ 680 هه‌زار و 443 ده‌نگده‌ری گشتی و 55 هه‌زار و 100 كه‌سیش ده‌نگده‌ری تایبه‌تن.

له‌ هه‌ڵه‌بجه‌ش به‌ گشتی 62 هه‌زار و 584 ده‌نگده‌ر هه‌ن، كه ‌له‌وه‌ 59 هه‌زار كه‌س له‌ ده‌نگدانی گشتی و  579 كه‌سیش له‌ ده‌نگدانی  تایبه‌تدا بۆیان هه‌یه‌ ده‌نگ بده‌ن.

به‌ پێی مەڕسوومی سه‌رۆكایه‌تیی هەرێمی کوردستان، رێكه‌وتی 20 ئۆكتۆبه‌ری ئه‌مساڵ، هەڵبژاردنی خوولی شەشەمی پەرلەمانی کوردستان بەڕێوەدەچێت.