سەرچاوەیەکی ئاگادار لە وەزارەتی دارایی و ئابووریی حكوومەتی هەرێمی كوردستان ڕاگەیاند: “ئەمڕۆ نووسراوی ناردنی لیستی مووچەی مانگی شەشی فەرمانبەران و مووچەخۆرانی هەرێمی کوردستان بۆ وەزارەتی دارایی فیدراڵی واژۆ کرا.”
سەرچاوەکە ئاماژەی بەوەش دا، بڕیارە ئەمڕۆ لیستەکە، کە پێکهاتووە لە لیستی مووچە بە سی دی و کاغەزی، بۆ بەغدا ڕەوانە بکرێت.
ڕۆژی 4/6/2024، وەزارەتی دارایی و ئابووریی حكوومەتی هەرێمی كوردستان، لیستی مووچەی مانگی ئایاری فەرمانبەران و مووچەخۆرانی هەرێمی کوردستان، ڕادەستی وەزارەتی دارایی حکوومەتی فیدراڵ کردبوو.
دوێنێ چوارشەممە 26/6/2024، پێشه‌وا هه‌ورامانی، گوتەبێژی حکوومەتی هەرێمی کوردستان، رایگەیاند: “له‌به‌ر دوو هۆكار ده‌بێت مانگانه لیستی مووچه‌خۆران ره‌وانه‌ی به‌غدا بكرێ، یه‌كه‌میان ئه‌وه‌یه، كه مانگانه به‌هۆی پله‌به‌رزكردنه‌وه و گۆڕانكارییه‌كانی دیكه‌ی مووچه، گۆڕانكاری له قه‌باره‌ی لیسته‌كه‌شدا ڕوو ده‌دات، هۆكاری دووه‌میش ئه‌وه‌یه كه ئه‌مه خواستێكی حكوومه‌تی فیدراڵه، مانگانە لیستەکان جیاوازن.”
گوتیشی: “لیستی مووچەی فەرمانبەرانی هەرێمی کوردستان تەواو بووە، بۆ وەزارەتی دارایی عێراق دەنێردرێت.”
د. محەمەد زراری، بەڕێوەبەری گشتی له دیوانی چاودێریی دارایی هەرێمی کوردستان، ڕاگەیاند: “مانگانە لیستی مووچەی فەرمانبەران و مووچەخۆران و هێزە ئەمنییەکان لای ئێمە وردبین دەکرێت و پاشان بۆ بەغدا دەنێردرێ.”