حکومەتی ناوەندی بەردەوام کۆسپ دەخاتە بەردەم ناردنی مووچەی فەرمانبەرانی هەرێم. هەر مانگە و پاساوێکی نوێ دەهێنرێتەوە، بەجۆرێک کە هیچ مانگێک لە کاتی خۆیدا مووچە نەنێردراوە. تا ئێستاش چارەنووسی مووچەی مانگی حەوت ناڕوونە.
ڕێبەر ئەحمەد، وەزیری ناوخۆی هەرێم، لە کۆنگرەیەکی ڕۆژنامەوانیدا ڕایگەیاند: “ئامادەکردنی لیستی مووچەی هێزە ئەمنییەکان و فەرمانبەران بە شێوەیەکی ڕێکوپێک ئەنجام دراوە. دواخستنی مووچە تەنها بیانوویە و پەیوەندی بە وردبینییەوە نییە.”
بەگوێرەی وەزیری ناوخۆ، لە پشت نەناردنی مووچەوە ئیرادەیەکی سیاسی هەیە بۆ دروستکردنی کێشە بۆ هەرێم، بەتایبەت لەم کاتەدا کە پرۆسەی هەڵبژاردن نزیکە. ئەم کردارەشی بە پێچەوانەی دەستوور و یاسا وەسف کرد.
لەکاتێکدا چەند ڕۆژێک ماوە بۆ دەستپێکردنی مانگی نۆ، وەزارەتی دارایی عێراق لە کۆی نزیکەی 950 ملیار دینار، تەنها 35 ملیار و نیوی بۆ مووچەی مانگی حەوت خەرج کردووە. هەروەها بەبێ ڕوونکردنەوە، 550 ملیار دیناری بۆ مووچەی مانگی هەشت خەرج کردووە.