ئه‌مرۆ دووشه‌ممه 24ی6ی2024، دوا ده‌رفه‌ته بۆ پێشكه‌شكردنی داواكاریی و تۆماركردنی حزب و هاوپه‌یمانێتی و كاندیدی سه‌ربه‌خۆ بۆ هه‌ڵبژاردنی خوولی شه‌شه‌می په‌رله‌مانی كوردستان.
كۆمسیۆنی باڵای سەربەخۆی هەڵبژاردنەکانی عێراق دوای ئەوەی له 13ی حوزه‌یران وادەی تۆماركردنی پارت، هاوپەیمانێتی و کاندیدانی پێکهاتەکان و سەربەخۆی درێژ کردەوە، ئه‌مرۆ لەگەڵ کۆتایی هاتنی دەوامی ئاسایی نووسینگەکانی کۆمیسیۆن لە پارێزگاکانی هەرێمی کوردستان وادەکە کۆتایی دێت.
پێشووتریش جومانه غه‌لای گۆته‌بێژی كۆمسیۆنی باڵای هه‌ڵبژاردنه‌كانی عێراق ڕایگەیاند ، له‌گه‌ڵ درێژكردنه‌وه‌ی واده‌ی تۆماركردنی ناوی پارت و هاوپه‌یمانێتی و كاندیده‌كان، 2 حزبی نوێ و 20 كاندیدی سه‌ربه‌خۆی نوێ ناوی خۆیان تۆمار كردووه.
ئاماژه‌ی به‌وه‌ش كردبوو، هه‌موو ئاماده‌كارییه‌كانی كۆمسیۆن زۆر به باشی به‌ڕێوه‌ده‌چن. ئاشكراشی كردبووه، تاكوو ئێستا 12 حیزب و 2 هاوپه‌یمانی و 77 كاندید ناوی خۆیان بۆ هه‌ڵبژاردنی خوولی شه‌شه‌می په‌رله‌مانی كوردستان تۆمار كردووه.