محەممەد شیاع سوودانی “سوپاسی پەرلەمانی عێراق” دەکات بۆ پەسندکردنی هەمواری یاسای بودجە و داوا دەکات، حکومەتی هەرێمی کوردستان و حکومەتی عێراق “دەستبەجێ دەست بکەن بە کارکردن” بەو هەموارە نوێیە بۆ وەبەرهێنانی نەوت بۆ ئەوەی ببێتە هاندەرێک بۆ پتەوکردنی سەقامگیری و جێبەجێکردنی کارنامەکانی حکومەت.
پەرلەمانى عێراق، رۆژی 2ـى شوباتى 2025، یەکەم هەموارى یاسای بودجەى سێ ساڵی عێراقى پەسەندکرد، هەموارەکە بڕگەى (ج) لە بەندى یەکەمى مادەى 12ـى یاساکەى هەڵوەشاندەوە و داڕشتەیەکى نوێى جێگیر کرد.
هەموارەکە تایبەت بە بەرهەمهێنان، گواستنەوە و رادەستکردنی نەوتی هەرێمی کوردستان، کە 16 دۆلاری وەکو تێچووی بەرهەمهێنان و گواستنەوەى بەرمیلێک نەوت دیاریکردووە، تاوەکو ئەو کاتەى لایەنێکى نێودەوڵەتیی راوێژکاری، نرخێکى خەمڵێندراو دیاری دەکات، دەبێت هەرێمى کوردستان رۆژانە 400 هەزار بەرمیل نەوت رادەست بکات.
گوتەبێژی حکومەتی عێراق راگەیێندراوێکی بڵاوکردووەتەوە و دەڵێت، سوودانی دەڵێت، دەنگدان لەسەر هەموارەکە بەپێی ئەو دەقەی کە ئەنجوومەنی وەزیران پەسەندی کردووە، سەقامگیریی سیاسی بەهێزتر دەکات و “هاوکاری بەرزی نێوان حکومەت و ئەنجوومەنی نوێنەران دەردەخات بۆ بەردەوامبوون لە کارکردن پێکەوە”.