لە چوارچێوەی بڕیارەکانی پارێزگای هەولێر بۆ پاراستنی ژینگەی شار، قارەمان مەولوود، سەرۆکی ئەنجوومەنی مۆلیدەکان، ڕاگەیاند: “دوێنێ لە کۆبوونەوەی ئەنجوومەنی مۆلیدەکان، خاوەن مۆلیدەکان ئاگادار کراونەتەوە، بە هیچ شێوەیەک چاوپۆشی لە بەکارهێنانی گازوایلی خراپ و دانەنانی فیلتەر بۆ نەهێشتنی دووکەڵی مۆلیدەکان ناکەین، هەر مۆلیدەیەک ببێتە هۆی پیسبوونی ژینگەی شار، ڕووبەڕووی سزای توند دەبێتەوە.”
سەبارەت بە دەنگی بێزارکەری مۆلیدە ئەهلییەکان گوتی: “دەتوانم بڵێم لە 99%ی مۆلیدە ئەهلییەکان بێدەنگ کراون، چەند مۆلیدەیەک لە سنووری پارێزگای هەولێر، تا ئێستاش دەنگیان بەرزە و خەڵک بێزار دەکەن، بەڵام بە هەماهەنگی لەگەڵ شارەوانیی هەولێر لە ماوەی 24 کاتژمێردا ئەم کێشەیە چارەسەر دەکرێت.”