بەرپرسانی ئەمەریكا و ئیسڕائیل نوێترین زانیارییان لەبارەی وادەی هێرشی ئێران بۆ سەر ئیسڕائیل ئاشكرا كرد لە تۆڵەی كوشتنی ئیسماعیل هەنییە كە لە 31ی تەمووزی رابردوو لە تاران هاتە كوشتن.
ماڵپەڕی (ئەكسیووس)ی ئەمەریكی لەسەر زاری بەرپرسانی ئەمەریكا و ئیسڕائیل گواستییەوە: هەرچەندە هێرشی تۆڵەكردنەوەی ئێران بۆ سەر ئیسڕائیل دواكەوتووە، بەڵام هێرشەكە لە چەند رۆژی داهاتوودا ئەنجام دەدرێت.
ئەمە لەكاتێكدایە كە دوێنێ شەممە حوسێن سەلامی فەرماندەی گشتیی سوپای پاسداران گوتبووی لەچەند رۆژی داهاتوودا هەواڵ و زانیاری نوێ لەبارەی هێرشی ئێران بۆ سەر ئیسڕائیل دەبیستن.
ئاماژەی بەوەشدابوو كە هەرچەندە وادەی هێرشەكە دواكەوتووە، بەڵام بە دڵنیاییەوە وەڵامیان دەبێت و تۆڵەی هێرشەكەی تاران و كوشتنی ئیسماعیل هەنییە دەكەنەوە.
پێشتریش كۆشكی سپی ئەمەریكا جەختی كردبووەوە، لە كاتی ئەنجامدانی هێرش بۆ سەر ئیسڕائیل دەستەوسان نابن و وەڵامی توندی ئێران دەدەنەوە.