سبەی بە بەشداریی مەسرور بارزانی ئاهەنگی نەورۆز بەڕێوە دەچێت
د. مەردان خدر، بەرپرسی لقی 9ی پارتی دیموکراتی کوردستان لە ئاکرێ، ڕایگەیاند، ھەموو ئامادەکارییەکانی ئاھەنگی نەورۆز لە ئاکرێ بەکۆتا ھاتوون، کە ئامادەکاریی زۆر باش کراوە و سبەی پێنجشەممە ھەموو خەڵکی ئاھەنگی نەورۆز لە ئاکرێ دەبینن، کە بەرنامەیەکی زۆر رێکوپێک دانراوە و میوانیش لەسەر ئاستی باڵا بەشدار دەبن و نوێنەری سەرجەم وڵاتان و باڵیۆزی وڵاتان بەشداری لە ئاهەنگەکەدا دەکەن، کە ئەوانەی بەشداری لە ئاهەنگی جەژنی نەورۆز دەکەن، لە ئاکرێ پێشوازییان لێ دەکرێت.
بەرپرسی لقی 9ی پارتی گوتیشی، مەسرور بارزانی، سەرۆکی حکومەتی ھەرێمی کوردستان پێشوازی لە میوانان دەکات و بەشداری لەو ئاھەنگەدا دەکات و وتارێکیش پێشکەش دەکات وەکو پارساڵیش بەشدار بوو و وتاری ھەبوو، بۆیە لە ھەرێمی کوردستان و عێراقیش لەسەر ئاستی باڵا بەرپرسان بەشداری لە ئاهەنگی نەورۆز لە ئاکرێ دەکەن، کە نەورۆزێکی رێکوپێک و جیاواز دەبێت و جوانترین ئاهەنگی نەورۆز لە ئاکرێ بەڕێوە دەچێت.